Thursday, August 15, 2013

" လူ့ကျင့်ဝတ်မသိတတ်သူများနှင့် ကျွန်မ"

6 comments



အခုနောက်ပိုင်း ကျွန်မဘလော့လေးမှာ ပို့စ်အသစ်မတင်ဖြစ်တာကြာပါပြီ။ တင်ဖြစ်ရင်တောင် တစ်ပုဒ်နဲ့ တစ်ပုဒ် တော်တော်လေးခြားသွားတယ်။ အရင်လို ခပ်စိပ်စိပ်မတင်ဖြစ်ဘူး။ အကြောင်းကတော့ အလုပ်များနေတာရယ်၊ ပို့စ်အသစ်တင်ဖြစ်အောင် ဘေးနားကနေ အမြဲသတိပေး တိုက်တွန်းတတ်တဲ့ စာရေးဆရာက အနားမှာမရှိတာကြောင့်ပါ။

ဘလော့မှာ ပို့စ်အသစ်မတင်ဖြစ်ပေမယ့် Facebook မှာတော့ ရသာချိုဟင်းလျာများPage လေးဖန်တီးပြီး ကျွန်မရဲ့ ဘလော့မှာ ဖော်ပြပြီးသား ဟင်းလျာဓါတ်ပုံလေးတွေနဲ့ ချက်နည်းဖတ်ရှုနိုင်မယ့် လင့်လေးတွေ တင်ပေးဖြစ်ပါတယ်။ ဒီလိုနဲ့ တလောက တခြားသူတွေရဲ့ဘလော့တွေ လျှောက်လည်ရင်းနဲ့ ပို့စ်တစ်ခုသွားတွေ့ပါတယ်။ အကြောင်းအရာက မော်ဒယ်တစ်ယောက်က မျှစ်တာလပေါဟင်း ချက်နည်းလေး ပြောပြတဲ့အကြောင်းပါ။ မျှစ်တာလပေါဟင်းကို ချက်စားလေ့ရှိတဲ့ အိမ်ရှားပါတယ်။ ဒီဟင်း က ၀ါးပိုးမျှစ်အစိမ်းနဲ့ ချက်ရတာဖြစ်ပြီး ရန်ကုန်မှာ ၀ါးပိုးမျှစ်အစိမ်းရဖို့ကလည်း ရှားတာကိုး။ ပြီးတော့ တစ်ဦးနဲ့ တစ်ဦး ချက်ပုံချက်နည်း အနည်းငယ်စီကွဲလွဲတတ်ပါတယ်။ တိုင်းရင်းသားဒေသမှာ ချက်လေ့ရှိတဲ့ ဟင်းလျာမို့ ကိုယ့်ဒေသအလိုက် ချက်ပုံချက်နည်း ကွဲလွဲတာပါ။ ကျွန်မဘွားဘွားဇာတိက မွန်ပြည်နယ်ဘက်ကမို့ မျှစ်တာလပေါဟင်းကို ကျွန်မငယ်ငယ်ကတည်းက စားဖူးသလို တအိမ်သားလုံးလည်း သိပ်ကြိုက်ကြပါတယ်။ ၀ါးပိုးမျှစ်အစိမ်းကိုလည်း နယ်ကအမျိုးတွေက မိုးဦးကျဆို ကျွန်မတို့ဆီ ပုံမှန်လိုလိုပို့ပေးလေ့ရှိပါတယ်။  ဒီတော့ ကျွန်မရဲ့ဘလော့လေးမှာလည်း ၀ါးပိုးမျှစ်နဲ့ချက်တဲ့ မျှစ်တာလပေါဟင်းချက်နည်းလေး ကို ကျွန်မကိုယ်တိုင်ချက်ထားတဲ့ မျှစ်တာလပေါဟင်းလျာဓါတ်ပုံလေးနဲ့ အတူ ပို့စ်လေးတစ်ပုဒ် တင်ဖြစ်ခဲ့ပါသေးတယ်။ ခုနကပြောခဲ့သလို ကျွန်မဘလော့လည်ရင်း သွားတွေ့တဲ့ မော်ဒယ်တစ်ဦး ပြောပြတဲ့ မျှစ်တာလပေါဟင်းဆိုပြီး တင်ထားတဲ့ ဒီပို့စ် လေးမှာ ကျွန်မဘလော့မှာ တင်ထားခဲ့တဲ့ ကျွန်မဘလော့နာမည်လေးလည်းပါတဲ့ ဓါတ်ပုံကို ကူးယူဖော်ပြထားတာတွေ့လိုက်ရပါတယ်။ တကယ်ဆို ဒီမော်ဒယ်မလေးချက်တဲ့ဟင်းလျာပုံကိုပဲ တိုက်ရိုက်ဖော်ပြပေးသင့်တာပါ။ တကယ်လို့ အခွင့်မသင့်လို့ မော်ဒယ်မလေးချက်တဲ့ဟင်းရဲ့ဓါတ်ပုံကို မရခဲ့ရင်လည်း ချက်နည်းက မော်ဒယ်မလေးပြောတာဖြစ်ပြီး ဓါတ်ပုံကိုတော့ မည်သည့်ဘလော့မှ ကူးယူဖော်ပြထားပါသည်လို့ မှတ်ချက်လေး ရေးပေးသင့်ပါတယ်။ ကျွန်မခင်ပွန်းက ကျွန်မရဲ့ဘလော့က ဓါတ်ပုံတွေကို ယူသုံးထားကြောင်း မဖော်ပြထားတဲ့အတွက် အဲဒီ့ပို့စ်အောက်မှာ ကွန်မန့်ဝင်ရေးခဲ့ပေမယ့် ဘယ်လိုအကြောင်းပြန်မှုမျိုးမှ မတွေ့ရသလို ပုံကိုလည်း ပြန်မဖြုတ်ပေးခဲ့ပါဘူး။

ဒီလိုတွေ့ပြီး သိပ်မကြာခင်မှာပဲ Facebook ပေါ်မှာ မိတ်ဆွေတစ်ယောက် Share ထားတဲ့ ပို့စ်လေး တစ်ခု သွားတွေ့ပြန်ပါတယ်။ ပို့စ်ရေးတဲ့သူက မြန်မာပြည်မှာ ကင်ဆာရောဂါဖြစ်ပွားမှုနှုန်းမြင့်တက်နေကြောင်းနဲ့ အဲဒီလိုဖြစ်ရတာဟာ အသားကင်တွေနဲ့၊ ဆိုးဆေးပါတဲ့ အချဉ်ရည်တွေ၊ ပလပ်စတစ်ဘူးတွေ အသုံးပြုကြတာတွေ ကြောင့်ဆိုပြီး ဖော်ပြထားပါတယ်။  သူကလည်း သိနားလည်သလောက် ကျန်းမာရေး ဗဟုသုတဝေမျှတာဖြစ်ပါလိမ့်မယ်။  သည်လို ဖော်ပြရာမှာ ဓါတ်ပုံမပါလည်း ပို့စ်တစ်ခုကို ဖော်ပြနိုင်ပါတယ်။ တကယ်လို့ ဓါတ်ပုံနဲ့ တစ်ကွ ဖော်ပြချင်တယ်ဆိုလျှင်လည်း လိုချင်တဲ့ပုံကို မိမိဘာသာဖန်တီးရိုက်ကူးပြီး တင်ပြနိုင်ပါတယ်။ ဒါပေမယ့် သည်လူက ကျွန်မရဲ့ဘလော့မှာ တင်ထားတဲ့ ၀က်သားတုတ်ထိုးနဲ့ ကြာဇံကြော် ပို့စ်မှာ ဖော်ပြထားခဲ့တဲ့ အချဉ်ရည်ရဲ့ပုံကို ကူးယူသုံးစွဲထားပါတယ်။ ကျွန်မရဲ့အချဉ်ရည်က မန်ကျည်းရည်ဖျော်၊ ထန်းလျက်၊ ငရုတ်သီးအစိမ်းမှုန့်လေးရောပြီး ဖျော်ထားတာပါ။ ထိုသူ ကူးယူဖော်ပြထားတဲ့ ပုံမှာ ကျွန်မရဲ့ဘလော့အမည်လေးလည်းပါပါတယ်။ ကျွန်မဘလော့မှာတင်သမျှ ကျွန်မရိုက်ကူးထားတဲ့ ပုံတွေမှာ ကျွန်မရဲ့ ဘလော့နာမည်လေး အမြဲဖော်ပြထားလေ့ရှိပါတယ်။ သည်လူ လုပ်ပုံက ကျွန်မချက်ပြုတ်ထားတဲ့ အစားအစာတွေဟာ စားလို့ မသင့်တော်ဟန်ပေါက်နေပါတယ်။ တကယ်ဆို ကျွန်မလည်း အစားအစာချက်ပြုတ်ရောင်းချတဲ့သူတစ်ဦး မဟုတ်ပါဘူး။ ကိုယ့်ဝါသနာလေးနဲ့ ကိုယ် တတ်သလောက်မှတ်သလောက်လေး ချက်ပြုတ်နေတဲ့ အိမ်ရှင်မတစ်ဦးမျှသာဖြစ်ပါတယ်။ ဒါပေမယ့် မိမိချက်ပြုတ်ထားတဲ့ အစားအစာကို အသားလွတ် စော်ကားသလိုလုပ်ပုံကိုတော့ ဘယ်လိုမှ သည်းညည်းမခံနိုင်ပါဘူး။ ကျွန်မခင်ပွန်းက ပို့စ်ရေးတဲ့သူကို Private Message ကနေတဆင့် ကျွန်မရဲ့ဘလော့ကပုံကို ပြန်ဖြုတ်ပေးဖို့ အသိပေးခဲ့ပေမယ့် ဘယ်လို တုန့်ပြန်မှုမှမရခဲ့ပါဘူး။

ဒီနေ့တော့ Facebook ထဲမှာ သူငယ်ချင်းတစ်ယောက်က လင့်ပို့ပေးလို့တွေ့လိုက်တာက လူတစ်ယောက်က MPT ကွန်နက်ရှင်အကြောင်းကို ဟာသဖောက်ပြီး ရေးထားတဲ့ သရော်စာလေးပါ။ သည်သရော်စာလေး မှာလဲ ကျွန်မဘလော့မှာ တင်ထားခဲ့တဲ့ ငါးသလဲထိုးဟင်း ပုံကို ကူးယူသုံးစွဲထားတာတွေ့ရပါတယ်။ ဒါနဲ့ ကျွန်မခင်ပွန်းလည်း ပထမတစ်ဦးတုန်းကလိုပဲ Private Message ကနေတဆင့် ကျွန်မဘလော့ကပုံကို ပြန်ဖြုတ်ပေးဖို့ အကြောင်းကြားတော့ ပို့စ်ပိုင်ရှင်က ချက်ချင်းပဲ ခွင့်မတောင်းပဲယူသုံးမိတဲ့အတွက် တောင်းပန်ပါတယ်၊ ပုံကိုလည်း ပြန်ဖြုတ်ပေးပါ့မယ်ဆိုပြီး တကယ်လည်း ပြန်ဖြုတ်ပေးခဲ့ပါတယ်။

ကျွန်မရဲ့ဘလော့မှာရော Page မှာပါ ကျွန်မရဲ့ဟင်းလျာဓါတ်ပုံတွေကို ကူးယူဖော်ပြချင်ရင် ကြိုတင်ခွင့်တောင်းပြီးမှ အသုံးပြုဖို့ ဖော်ပြထားပြီးသားပါ။ အခုတော့ ကူးချင်သလို ကူးပြီး ဖော်ပြချင်သလို ဖော်ပြနေကြတာပါပဲ။

ကျွန်မ တစ်ခုနားလည်လိုက်တာကတော့ တစ်ချို့လူတွေဟာ အခြေခံ လူ့ကျင့်ဝတ်လေးကိုတောင် ကောင်းကောင်း နားမလည်ကြဘူးဆိုတာပါပဲ။ ကျွန်မတို့ ငယ်စဉ် ကလေးဘ၀ကတည်းက  လေ့လာသင်ကြားခဲ့ရတာကတော့ သူတပါးပစ္စည်းဥစ္စာကို ပိုင်ရှင်မသိရင် မယူငင်ရဘူးဆိုတာပါပဲ။ သက်ရှိ၊ သက်မဲ့၊ ဒြပ်ရှိ၊ ဒြပ်မဲ့ မည်သည့် ဥစ္စာမဆို ပိုင်ရှင်မသိဘဲယူရင်တော့ ခိုးယူတာပါပဲ။ ဒြပ်မရှိဘဲ သူတပါးစိတ်ကူးဥာဏ်နဲ့ စဉ်းစားဖန်တီးထားတဲ့ စိတ်ကူးတစ်ခုကို ယူသုံးချင်ရင်တောင် ခွင့်တောင်းပြီးမှ အသုံးပြုရမှာပါ။ ဒီလိုမျိုးသူတစ်ပါး ဖန်တီးထားတဲ့ ဓါတ်ပုံလိုဟာမျိုးကို ကူးယူအသုံးပြုချင်ရင် ပိုင်ရှင်ကို ခွင့်တောင်းသင့်ပါတယ်။ ကျွန်မဖန်တီးထားတဲ့ ပုံတွေမှာ ဘလော့နာမည်လေး အမြဲတွဲလျက် ဖော်ပြထားလို့ ခွင့်တောင်းချင်ရင် ပိုင်ရှင်ရှာရမှာလည်း မခက်ခဲလှပါဘူး။ ပိုင်ရှင်ရှာရခက်ခဲတဲ့ Google က အမည်မဖော်ပြထားတဲ့ ပုံတွေဆိုရင်တောင် Googel မှ ကူးယူဖော်ပြပါသည်ဆိုတဲ့ စာကြောင်းလောက်တော့ ထည့်သွင်းပေးသင့်ပါတယ်။ ဒီလောက်အခြေခံကျတဲ့ ကျင့်ဝတ်လေးတောင် နားမလည်တဲ့ လူတွေများလာရင် ရေရှည်မှာ လောကကြီး ပျက်စီးဖို့ပဲရှိပါတော့တယ်။ ကျွန်မကတော့ သည်လူတွေကို "လူ့ကျင့်ဝတ်မသိတတ်သူများ" လို့သာ ကင်ပွန်းတပ်လိုက် ချင်ပါတော့တယ်။

ပါရမီဖြည့်ဖက်လေး
၁၃း၃၁ နာရီ
၁၄.၈.၂၀၁၃

Wednesday, June 12, 2013

" ပုဇွန်မရိုနိစ် "

1 comments
ဟင်းတွေကထပ်နေပြီ။ ဘာဟင်းချက်စားရမှန်းမသိတာနဲ့ ပုဇွန်ကို မရိုနိစ် နဲ့ ချက်စားဖြစ်တယ်။ ပုဇွန်ကို အခွံခွာ၊ ကျောခွဲ၊ ရေဆေးပြီး ဆား၊ ငရုတ်ကောင်းမှုန့်နဲ့ နယ်ထားပါတယ်။ နာရီဝက်ခန့်နှပ်ထားပြီးရင် ပုဇွန်တွေကို တန်ပူရာမှုန့်၊ ကြက်ဥအကာတို့နဲ့ ရောနယ်ပြီး ဆီပူပူများထည့်ကြော်ပါတယ်။ ကြော်ပြီးသား ပုဇွန်တွေကို ဆီစစ်ပါတယ်။ ပန်းကန်တစ်လုံးမှာ မရိုနိစ်အနည်းငယ်နဲ့ သံပုရာရည် အနည်းငယ်ကို ရောမွှေပါတယ်။ ပုဇွန်ကြော်တွေ ဆီခြောက်ပြီဆို မရိုနိစ်ဖျော်ထားတဲ့ပန်းကန်ထဲကို ပုဇွန်ရောထည့်ပြီး သမအောင်မွှေပါတယ်။ ခရမ်းချဉ်သီး အကွင်းလေးတွေလှီးပြီး တွဲဖက်လိုက်ရင်တော့ ပုဇွန်မရိုနိစ်လေးရပါပြီ။ ဆလတ်ရွက်လေး ပါရင်တော့ ပိုကောင်းမှာပါ။




Wednesday, June 5, 2013

" ပဲသွေးပင်စိမ်းချက် "

0 comments
အိမ်မှာပဲသွေးဝယ်ပြီးသားအဆင်သင့်ရှိနေတာနဲ့ အလွယ်တကူပင်စိမ်းလေးနဲ့ ချက်စားဖြစ်တယ်။ အရင်ဆုံး ပဲသွေးကို ရေဆေးပြီး အတုံးလေးတွေတုံးပါတယ်။ ပြီးတော့ ဆားလေးနဲ့နယ်နှပ်ထားတယ်။ ကြက်သွန်ဖြူနုတ်နုတ်စင်းတယ်။ ကြက်သွန်နီကို ပါးပါးလှီးပါတယ်။ ပင်စိမ်းကို အရွက်ခြွေပြီး ရေဆေးထားပါတယ်။ ငရုတ်သီးစိမ်း အစပ်စားနိုင်သလောက်ကို ရေဆေးပြီး ပါးပါးတစောင်းလေး လှီးထားပါတယ်။ အားလုံးအဆင်သင့်ဖြစ်ရင် မီးဖိုပေါ်ဆီအိုးတင်ပြီး ကြက်သွန်ဖြူနီထည့် ဆီသတ်ပါတယ်။ ကြက်သွန်လေးတွေရွှေရောင်သန်းပြီးကျွတ်သွားမှ ငရုတ်သီးအစိမ်းမှုန့်လေး ထည့်ပါတယ်။ တစ်ဆက်တည်း ပဲသွေးတွေထည့်မွှေပါတယ်။ အပေါ့အငံအဖြစ် ကြက်သားမှုန့်ထည့်ပါတယ်။ ပဲသွေးကထွက်တဲ့ ရေခန်းပြီး ဆီပြန်လာပြီ၊ ပဲသွေးလည်း ကျက်ပြီဆိုမှ ငရုတ်သီးစိမ်းထည့်ပါတယ်။ ခဏမွှေပြီးရင် ပင်စိမ်းတွေထည့်မွှေပြီး မီးပိတ်ပါတယ်။ ဒါဆို ပဲသွေးပင်စိမ်းချက်လေး ရပါပြီနော်။


Saturday, May 25, 2013

" ၀က်နံရိုးကုလားပဲဟင်း "

1 comments
ဒီတစ်ခါတော့ ၀က်နံရိုးကို ကုလားပဲလေးနဲ့ ချက်စားဖြစ်တယ်။ ၀က်နံရိုးတွေကို ရေဆေးပြီး ပဲငံပြာရည် အကြည်၊ အနောက်နှစ်မျိုးလုံးနဲ့ ရောနယ်ထားတယ်။ ကုလားပဲကို ရေဆေးပြီး အိုးတစ်လုံးထဲထည့်၊ ရေထည့်ပြီး ပဲတွေနူးခါနီးအထိ ကြာကြာလေးပြုတ်ပေးပါတယ်။ ကြက်သွန်ဖြူနီဂျင်း ရောထောင်းပါတယ်။ အားလုံး အဆင်သင့်ဖြစ်ရင် အိုးတစ်လုံးမှာ ဆီအနည်းငယ်ထည့်ပြီး ကြက်သွန်ထောင်းထားတာနဲ့ ငရုတ်သီးအရောင်တင်မှုန့်ရောပြီး ဆီသတ်ပါတယ်။ ကြက်သွန်လေးတွေ မွှေးလာရင် ၀က်နံရိုးထည့်လုံးပါတယ်။ အပေါ့အငံပြင်ပါတယ်။ ၀က်သားချက်ရင် ကျွန်မကတော့ ပဲငံပြာရည်ပဲသုံးပါတယ်။ ငါးငံပြာရည် မသုံးပါဘူး။ နံရိုးကထွက်တဲ့ရေခန်းလို့ ဆီပြန်ရင် ကုလားပဲအိုးထဲကို ဆီသတ်ထားတာတွေ ရောထည့်ပြီး တည်ပေးပါတယ်။ ရေလိုရင် ရေနွေး ထပ်ဖြည့်ထည့်ပါတယ်။ ၀က်နံရိုးလည်းနူး ပဲလည်းနူးပြီဆို ၀က်နံရိုးကုလားပဲဟင်းလေးရပါပြီ။



Thursday, May 9, 2013

" ကြက်သားပင်စိမ်း "

1 comments
ကြက်သားကို ဆီပြန်ဟင်းတွေချည်းစားနေရတာ ရိုးအီနေပြီမို့ ဒီတစ်ခါတော့ ကြက်သားပင်စိမ်းလေး ချက်စားဖြစ်တယ်။ ကြက်သား အသားချည်းသက်သက်ကို ရေစင်အောင်ဆေး၊ ခပ်ပါးပါး သေးသေးလေးတွေဖြစ်အောင် လှီးပြီး ဆားနယ်ထားပါတယ်။ ကြက်သွန်ဖြူနဲ့ချင်းကို ညက်နေအောင်ထောင်းပြီး ကြက်သွန်နီကို ဒါးနဲ့နုတ်နုတ်စင်းပါတယ်။ ခရမ်းချဉ်သီးကို အစေ့ထုတ်၊ ရေဆေးပြီး ခပ်သေးသေးလေးထောင့်တုံးလေးတွေ ဖြစ်အောင် လှီးပါတယ်။ ငရုတ်သီး အစပ်စားနိုင်သလောက်ကို ပါးပါးလှီးထားပါတယ်။ ပင်စိမ်းကို အရွက်ချွေ၊ ရေဆေးထားပါတယ်။ သံပုရာသီးအရည်ညှစ်ထားပါတယ်။

မီးဖိုပေါ်ဒယ်အိုးတင်၊ ဆီအနည်းငယ်ထည့်ပြီး ဆီကျက်လာရင် ကြက်သွန်ဖြူနီချင်း ထည့်ပြီး ဆီသတ်ပါတယ်။ ကြက်သွန်တွေအနီရောင်သန်းပြီး ကျွတ်လာရင် ငရုတ်သီးအစိမ်းမှုန့် အနည်းငယ်ထည့်ပြီး ကြက်သားကိုထည့်ကြော်ပါတယ်။ ငံပြာရည်နဲ့ ကြက်သားမှုန့်ထည့်ပြီး ကြက်သားမှ ထွက်တဲ့ ရေကုန်တဲ့အထိ ကြော်ပေးပါတယ်။ ကြက်သားဆီပြန်လာရင် ခရမ်းချဉ်သီးထည့် ကြော်ပါတယ်။ ခဏမွှေပေးပြီး ငရုတ်သီးစိမ်းထည့်ပါတယ်။ သံပုရာရည်ထည့်ပြီး အပေါ့အငံအနေတော်ဆို ပင်စိမ်းတွေထည့်မွှေပြီး မီးပိတ်ပါတယ်။ ဒါဆို ပင်စိမ်းနံ့သင်းသင်းလေးနဲ့ ကြက်သားပင်စိမ်းလေးရပါပြီ။ ချဉ်စပ်လေးမို့ ထမင်းဖြူပူပူလေးနဲ့ဆို အင်မတန်လိုက်ဖက်ပါတယ်။





Sunday, April 7, 2013

"၀က်နံရိုးပေါင်း"

1 comments
ဒီတစ်ခါတော့ ၀က်နံရိုးပေါင်းလေးလုပ်စားချင်တာနဲ့ နံရိုးအသားများတာလေး ရွေးဝယ်ခဲ့တယ်။ ၀က်နံရိုးကို အမြောင်းလိုက်တုံးပြီး ရေစင်အောင်ဆေးပါတယ်။ ပြီးတော့ ဆား၊ ပဲငံပြာရည် အကြည်အနောက်နှစ်မျိုး၊ သကြားအနည်းငယ်တို့နဲ့ သမအောင်ရောနယ်ပြီး နာရီဝက်ခန့် နှပ်ထားပါတယ်။

နံရိုးနှပ်ထားတုန်းမှာ ကြက်သွန်ဖြူ၊နီ၊ဂျင်း ထောင်းပါတယ်။ ငရုတ်သီး မထည့်ပါဘူး။ အဖြူထည်ပေါင်းမှာပါ။ ဒယ်အိုးထဲကို ဆီအနည်းငယ်ထည့်ပြီး ကြက်သွန်ဆီသပ်ပါတယ်။ ကြက်သွန်လေးတွေလိပ်ပြီး ရွှေရောင်သန်းလာရင် နှပ်ထားတဲ့ ၀က်နံရိုးရောထည့်ပြီးလုံးပါတယ်။ အငံအတွက် ပဲငံပြာရည်အကျဲရေသုံးပါတယ်။ ၀က်နံရိုးကထွက်တဲ့ ရေခန်းပြီး မွှေးလာရင် မီးဖိုပေါ်ကချပါတယ်။

ဆီသတ်နဲ့လုံးထားတဲ့ နံရိုးတွေကို Pressure Cooker ထဲကို စီထည့်ပါတယ်။ နံရိုးမြုပ်သည်အထိ ရေနွေးထည့်ပါတယ်။ အရည်အတွက် အပေါ့အငံထည့်ပြီး ပေါင်းပါတယ်။ Pressure Cooker မှာ Meat ရွေးပြီး ပေါင်းလိုက်တာ ၁၅မိနစ်ဆိုရင် နူးညံ့ပြီးအရသာရှိတဲ့ နံရိုးပေါင်းလေးရပါပြီ။ ရိုးရိုးအိုးနဲ့ ပေါင်းချင်သူများလည်း ပေါင်းနိုင်ပါတယ်။ ချက်ပြုတ်ချိန်ပဲကွာသွားမှာပါ။







ပါရမီဖြည့်ဖက်လေး
၆.၄.၂၀၁၃
၁၁း၂၂ နာရီ

Monday, March 4, 2013

"ငါးပြေမ အချဉ်ဆီပြန်"

1 comments

ဒီတစ်ခါတော့ ဈေးထဲမှာ ငါးပြေမကြီးတွေတွေ့တာနဲ့ ၀ယ်ခဲ့တယ်။ ငါးပြေမကို အချဉ်ဆီပြန်လေး ချက်စားရတာကို သိပ်ကြိုက်တယ်။

ငါးပြေမကို ဗိုက်ခွဲ၊ အကြေးထိုး၊ ဘေးဆူးတောင်တွေလှီးထုတ်ပြီး ရေဆေး၊ ဆားဆနွင်းအချိုမှုန့် နယ်ထားပါတယ်။ ကြက်သွန်ဖြူနီ ငရုတ်သီးတစ်စုံ ထောင်းပါတယ်။ မန်ကျည်းသီးကို ရေဆေးပြီး ရေနွေးလေး နဲ့ စိမ်ထားပါတယ်။

ဒယ်အိုးထဲမှာ ဆီပူရင် ကြက်သွန်ထောင်းထားတာ ထည့်ြ့ပီးဆီသတ်ပါတယ်။ ကြက်သွန်ကျွတ်လာရင် ငါးထည့်၊ ငံပြာရည်နဲ့ အသားမှုန့်ထည့်လုံးပါတယ်။ ခဏလောက် ငရုတ်သီး ဆီသတ်နဲ့ငါးကို ရောလုံးပြီးမှာ ရေနွေး ထည့်ပြီး တည်ပါတယ်။ ငါးနူးရင် မကျည်းရည်ထည့် တည်ပါတယ်။ ရေခန်းလို့ ဆီပြန်ရင် ငါးပြေမ အချဉ်ဆီပြန်လေး သုံးဆောင်လို့ရပါပြီနော်။



Thursday, February 28, 2013

"ချဉ်ပေါင်ဇရစ်ရိုးကြော်"

2 comments
ဈေးထဲမှာ ဇရစ်ရိုးတွေ တွေ့တာနဲ့ ချဉ်ပေါင်နဲ့ ရောကြော်ဖို့ ၀ယ်ခဲ့တယ်။ ဇရစ်ရိုးကို တစ်လက်မ အရွယ်လောက် လက်ကလေးနဲ့ စိတ်ချွေပြီး ဆားရည်နဲ့ ခဏစိမ်ပါတယ်။ ပြီးတော့ ရေဆေးပြီး ဆန်ကာနဲ့စစ်ထားပါတယ်။ ချဉ်ပေါင်ကိုလည်း ချွေပြီး ဆားရည် ခဏစိမ်ပြီး ရေဆေးထားပါတယ်။ ငရုတ်သီး ကြက်သွန်ဖြူနီ ဆီသတ်ပါတယ်။ ကြက်သွန်ကျက်ပြီး မွှေးလာရင် ပုဇွန်ခြောက်မှုန့်ထည့်၊ ငါးပိစိမ်းစား ရေဖျော်ထည့်ပါတယ်။ ငရုတ်သီး လုံးကွဲလေးထည့်ပြီး ဇရစ်ရိုးထည့်ကြော်ပါတယ်။ ငံပြာရည်၊ အချိုမှုန့်ထည့်ပြီး ကြော်ပါတယ်။ ဇရစ်ထည့်ပြီး ခဏနေရင် ချဉ်ပေါင်ထည့်ကြော်ပါတယ်။ ဆီပြန်ပြီး ချဉ်ပေါင်ကို အိနေအောင် မွှေပြီးကြော်ပေးပါတယ်။ အရသာမြည်းပြီး အနေတော်ဆို ချဉ်ပေါင်နဲ့ ဇရစ်ရိုးကြော်လေးရပါပြီနော်။

ပါရမီဖြည့်ဖက်လေး
၂၅.၂.၂၀၁၃

Tuesday, February 26, 2013

"ငါးရံ့အူ အချဉ်ဆီပြန်"

2 comments
ကျွန်မ ဘလော့လေးလည်း ပို့စ်အသစ်မတင်ဖြစ်တာ တော်တော်ကြာပါပြီ။ အလုပ်များနေတာရယ်၊ ဟင်းတွေကလည်း ပို့စ်တင်ပြီးသားဟင်းတွေပဲ ချက်စားဖြစ်တာကြောင့်ပါ။

ဒီနေ့တော့ ဈေးထဲမှာ ငါးရံ့အူရတာနဲ့ ချက်စားဖြစ်တာကြောင့် ငါးရံ့အူဟင်းအကြောင်းလေး တင်ဖြစ်သွား တာပါ။

ငါးရံ့အူကို အူခွဲပြီး အစာဟောင်းတွေ ခြစ်ထုတ်ပါတယ်။ သည်းခြေကိုလည်း ထုတ်ပစ် ရပါတယ်။ တော်တော်ကြာကြာကို စိတ်ရှည်လက်ရှည် လုပ်ပေးရပါတယ်။ ပြီးမှ ရေစင်အောင်ဆေးကြောပြီး ဆား၊ ဆနွင်း၊ အချိုမှုန့် အနည်းငယ် (အသားနယ်တဲ့နေရာမှာ ကြက်သားမှုန့်သုံးရတာ မကြိုက်လို့ အချိုမှုန့် သုံးပါတယ်) နဲ့ နယ်ထားပါတယ်။

ကြက်သွန်ဖြူ၊နီ၊ ချင်း ငရုတ်တစ်စုံ ထောင်းထားပါတယ်။ မန်ကျည်းသီး အနည်းငယ် ကို ရေဆေးပြီး ရေနွေးလေးနဲ့ စိမ်ထားပါတယ်။ ဒယ်အိုးထဲကို ဆီထည့်ပြီး ဆီပူလာရင် ဆနွင်းလေး နည်းနည်း ထည့်ပါတယ်။ တစ်ဆက်တည်း ငရုတ်သီး ကြက်သွန်ဖြူနီ၊ချင်း ထောင်းထားတာ ထည့်ပြီး ဆီသတ်ပါတယ်။ ကြက်သွန်လေးတွေ ရွှေရောင်သန်းပြီး ကျွတ်လာရင် မဆလာလေးထည့်ပြီး ငါးရံ့အူတွေ ထည့်ပါတယ်။ ငံပြာရည်နဲ့ ကြက်သားမှုန့် (ဒီနေရာမှာ အချိုမှုန့်အစား ကြက်သားမှုန့် သုံးပါတယ်) ထည့်လုံးပါတယ်။ ငါးအူကထွက်တဲ့ ရေကုန်လို့ ဆီပြန်ပြီး မွှေးလာမှ နူးအောင် ရေနွေးထည့် တည်ပါတယ်။  ရေခမ်းခါနီးရင် ရေနွေးစိမ်ထားတဲ့ မန်ကျည်းရည် ထည့်တည်ပါတယ်။ ရေခမ်းပြီး ဆီပြန်ရင် မဆလာအနည်းငယ် ထပ်ထည့်အုပ်ပြီး မီးဖိုမီးပိတ်ပါတယ်။ ဒါဆို မဆလာနံ့ သင်းသင်းလေးနဲ့ အချဉ်ဆီပြန် ငါးရံ့အူဟင်းလေးရပါပြီ။





 ပါရမီဖြည့်ဖက်လေး
၂၅.၂.၂၀၁၃
Related Posts Plugin for WordPress, Blogger...